أغـنـيــــــــــات لـلـــــوطــــــــــن

أمــة الأمـجــاد

أمتى يا أمة الأمجاد والماضى العريق
يا نشيدا فى دمى يحيا ويجرى فى عروقى
أذن الفجر الذى شق الدياجى بالشروق
وطريق النصر قد لاح فسيرى فى الطريق
قبلة الأنظار يا أرض الهدى والحق كنت
ومنارا فى دجى الأيام للعالم عشت
أنت مهد النور .. مهد الفن والعرفان أنت
وستبقين ويبقى لك منا ما أردت
لا تبالى إن أساء الدهر يوما لا تبالى
قد صحونا لأمانينا .. صحونا لليالى
لك يا أرض البطولات ويا أم الرجال
ترخص الأرواح فى يوم الفدى يوم النضال
للغد المشرق يندى بالأمانى والعطور
أمتى .. سيرى إلى المجد و جدى فى المسير
حققى بالعمل البناء أحلام الدهور
و اصعدى بالعلم والأخلاق للنصر الكبير
اصعدى يا أرض أجدادى وأمى وأبى
اصعدى يا قلعة يحرسها كل أبى
اصعدى يا مشرق النور لأغلى مأرب
اصعدى للقمم الشماء فوق الشهب
أمتى يا أمة الأمجاد و الماضى العريق
يا نشيدا فى دمى يحيا ويجرى فى عروقى
أذن الفجر الذى شق الدياجى بشروق
وطريق النصر قد لاح فسيرى فى الطريق
****    ****    ****    ****
الجمال والحب في بلادي
شعر : سيد عبد العزيز
----

الجمال والحب في بلادي
والحضارة وإنتشارها وإزدهارها
في المدارس والنوادي
العلوم العالية والفنون الراقية
جمالها بادي
ينبي عن أثار قوة الأفكار
والأيادي
الأنجزت أعمال وخلدت تذكار
في جبين الوادي
سوداننا العاجبنا رسمه
في نفوسنا مقداره يسمو
الطيور غنت بي أسمه
وكم صايح ينادي
أسمك يابلادي
هتقت به الجنود
وغنتبو الشوادي
في بلادنا مناظر الطبيعة
حافيها السحر الحلال
في الشرق المينا العظيمة
بيها الثغر بسم الدلال
والغرب حرست مداخله
الهيبة حصون التلال
وجنوبها ينافس الشمال
حيوية وعظمة وجلال
في بلادنا القرى والمدائن
أثر النعمة عليها باين
وتاني محل العين تعاين
تشوف بهجة وروح وإعتدال
في منظر جذاب ودادي
أحي السودان وأرضه
والأرض الطاهرة النقية
أحي السودان وأهله
أهل العبقرية
أهني السودان بشعبه
طوح النفس الأبية
الوافي راعي المحارم
أكرم من الغيث مكارم
وأصلب من الحده صارم
إن في الحرب وإن مسالم
يمتاز بالروح القوية
مقدام ومن طبعه هادي
****    ****    ****    ****
اغنية لحسن عطية

في الفواد ترعاه العناية
بين ضلوعي الوطن العزبز
لي عداه بسوي النكايه
وان هزمت بلملم قواي
غير سلامتك ما لي غاية
انشاالله تسلم وطني العزبز
ليه ما ارعي الوطن الرعاني
والدهاه اشيله واعاني
الشباب والشيب شجعاني
قالو نفدي الوطن العزيز
بقاسمه حظه سواده وبياضه
وايه مرادي انا غير مراده
ارعي نيله اشجع بلاده
يشلو حمل الوطن العزيز
عندي وطني بقضيلي حاجه
لي عدوك يا وطني العزبز
طبيعي اعشق صيده ورماله
وما ببيعه وافول مالي وماله
ومابكون اله البي حباله
داير يكتف وطني العزيز
علمونا اهل الحضارة
كيف اضوق عشان وطني المرارة
والمحن برضاي اصلي ناره
خوفي تحرق وطني العزبز
شفنا فيه جواب فيافي
والبطير وبسابق السوافي
مامراده عفارم عوافي
بس يعظم وطني العزبز
نحن للقوميه النبيلة
مابندور عصبية القبيلة
تربي فينا ضغائن وبيله
تزيد مصايب الوطن العزبز

وفي الفؤاد ترعاه العناية *** بين ضلوعي الوطن العزيز
****    ****    ****    ****  
وطن الجــــــــــــــــدود
كلمات:محمد عوض الكريم القرشي
أداء:عثمان الشفيع

وطـــــنـــي .. وطـــــنـــي
وطن الجدود نفديك بالأرواح نجود وطــــنــي
وطن الجدود نِعم الوطن
خيراتو كم يتدفـــــقـــن
آن الآوان أن نـُُـمتحـــن
في سبيلو لا نطلب ثمن
وطن الجدود نحن الفداء
من المكائــــد والعـــــدا
نتمنى ليك دايما تســـود
بدمانا نكتب ليك خــلـود
هيا يا شباب هيا ياجنـود
هيا حطمــوا هذي القيود
هيا يا شباب هيا للأمام
سودانّا قد ملّ المــــــلام
حرية كاملة هي المُرام
تؤخذ ولا يجدي الكلام
حذاري أن وطنك يضام
حذاري أن يصبح حطام
جهلٌ .. وفقرٌ .. وانقسام
فلنتحد ويجب نعــيــــد
لوطنّا أمجاد الكرام
هيا ياشباب ضموا الجنوب
القافلة ســــــارت لن تؤوب
أبنوا السلام دكوا الحروب
وماء نيلنا يكون عـــذوب
أهتف معي قل يا أخي
يحيا الكفاح وينتقي
فليخرج الباغي الشقي
ويرفرف العلم الأبّي
وطـــــنـــي .. وطـــــنـــي
وطن الجدود نفديك بالأرواح نجود
وطــــنــي
****    ****    ****    ****
أغنية : يا بلد يا حبوب
الشاعر: سيد أحمد الحردلو
اداء : محمد وردي
عشانك بكاتل الريح
عشانك فؤادي جريح
عشانك أنا مقتول
وبموت معاك مقتول
عشانك يا حزن نبيل
عشانك يا حلم جميل
عشانك يا بلد
يا نيل
يا ليل
يا سمح يا زين
يا بلدي يا حبوب
أبو جلابية و توب
سروال و مركوب
وجبة وسديري
وسيف سكين
يا سمح يا زين
يا وجه مليان غنا
مليان عشق وحنين
يا سمح يا زين
يا آهة يا نمة
يا مدحة يا عمة
يا واحة في الصحراء
يا خصلة يا قمرة
يا بشارة يا بكرة
يا سمح يا زين
يا غابة قمحية
مشرورة فوق البلود
زي الصباحية
يا مزرعة باباي
غضبة الهبباي
يا نخلة مسقية
من ريق دبيشية
يا مقطعين دوباي
نازلين على الدنيا
أشواق و حنية
يا سمح يا زين
يا ليل ليل وليلية
يا نيل ونيلية
يا مرمي تحت الشمس
للقيلة ضلية
يا سحنة نوبية
يا وشمة زنجية
****    ****    ****    ****
انا امـدرمـان

كلمات الشاعر: عبدالمنعم عبد الحي

انا امدرمان تأمل في نجوعى
انا السودان تمثل في ربوعى
انا ابن الشمال سكنته قلبى
علي ابن الجنوب ضميت ضلوعى
انا امدرمان سلوا النيلين عنى
وعن عزمات فتاي عند التجنى
فخير بنيك ياسودان منى
سلو الحادي سلوا الشادي المغنى
انا امدرمان اذا ما قلت اعنى
فما نيل المطالب بالتمنى
تجيش النفس بالآمال لكن ولكن هذه لم لا تدعنى
انا امدرمان مضي امسي بنحسى
غدا وفتاى يحطم قيد حبسى
واهمس والفضاء يعلن همسى
واهتف والوري يعرف حسى
واخرج للملأ في ثوب عرسى
وابسم بعدما قد طال عبسى
فيا سودان اذ ما النفس هانت
اقدم للفداء روحي بنفسى
****    ****    ****    ****
قصيدة بلادى أهلا يا بلادى
للعملاق إسماعيل حسن رحمه الله

بلادي اهلاً يا بلادي
الف تحية ليكي من الفؤادِ
بلادي اهلاً .. يا بلادي
صدورنا حماية ليكي من الاعادي

بلادي أنا بلاد ناساً في اول شي
موارثيم..كتاب الله
وخيل مشدود ، وسيف مسنون حداه درع
تقاقيبن تسرج الليل مع الحيران
وشيخاً في الخلاوي ورع

وكم نخلات تهبهب فوق جروفا الساب
وبقرة حلوبة تتضرّع وليها ضرع

وساقيةً تصحي الليل مع الفجراوي
يبكي الليل ويدلق في جداولو دمع
يخدر في بلادي سلام ..
خدرةً شاربة موية النيل تزغرد في البوادي زرع

بلادي سهول بلادي حقول
بلادي الجنة للشافوها او للبرة بيها سمع
بلاد ناساً تكرم الضيف
وحتى الطير يجيها جعان ومن اطراف تقيها شبع

بلاي أنا
تشيل الناس ، كل الناس
وساع بي خيرو لينا يسع
وتتدفق مياه النيل على الوديان
بياض الفضة في وهج الهجير بيشع

بلادي بلاد الصفقة والطمبور
وداراتاً تنح بالليل
وبنوتاَ تحاكي الخيل
يشابن زي جدّي الريل
وشبالن مكنتل في طريفو ودع

بلادي بلاد من التاريخ
من ترهاقا لا عند ميسنا ...
عاد ترجاك خيل ودروع

بلادي أمان ، بلدي حنان وناسا حُنان
يكفكفوا دمعة المفجوع
يحبو الدار يموتو عشان حقوق الجار
يخوضو النار شان فد دمعة
وكيف الحالة لو شافوها سايلة دموع ؟!

ديل اهلي .. ديل اهلي ..

يبدّوا الغير على زاتم
يقسموا اللقمة بيناتم
ويدّوا الزاد حتى ان كان مصيرم جوع

ديل اهلي .. ديل اهلي ..

ديل اهلي .. البقيف في الدارة
وسط الدارة واتنبر
وأقول لي الدنيا كل الدنيا
ديل أهلي

عرب ممزوجة بي دم الزنوج الحارة
ديل اهلي
ديل قبيلتي لما ادور افصل للبدور فصلي

اصحاب روحي والاحساس
وسافر في بحار شوقم زمان عقلي

أقول بعضي ...
ألاقيهم تسرّبوا في مسارب الروح
بقوا كُلي .. ديل اهلي

محل قبلت القاهم ..
معايا .. معايا زي ضلي

كان ما جيت من زي ديل وآسفاي وآماساتي وآآآآآآآذلي

تصور كيف يكون الحال لو ما كنت سوداني
واهل الحارة ما اهلي ؟؟

تصور كيف يكون الحال

وهذه للأنسان السوداني ..

الفينا مشهودة عارفانا
المكارم انحنا بنقودا

والحارة بنخوضا
الزول بفتخر يباهي بالعندو
نحن اسياد شهامة والكرم جندو
ما في وسطنا واحداً ما انكرب زندو
البعجز يقع بيناتنا بنسندو

الحارة بنخوضا...
ركابين عليهو الناصع أب غرة
نتباشر وقت نلقى الكلام حرة
ما بننفز يمين إن متنا فد مرة
الخواف ما حر منو نتبرا
الحارة بنخوضا..
الفينا مشهودة عارفانا
المكارم انحنا بنقودا
والحارة بنخوضا
للجار والصديق عشرتنا تتمنى
بنصون الأمانة السيدا أمنا
المغرور ندوسو ونعدموا الطنة
شافعنا بيرى الموت في الركاب سنة
****   ****   ****  ****  
أم در ياربوع

من ام در ياربوع سودانا نحييك وانت كل امالنا
فى غربك عروس الرمال وفى شرقك اية جمال
وجنوبك واسع مجال ياحلاة رطبك فى الشمال
من ام در ياربوع سودانا نحييك وانت كل امالنا
نحييك فى القرى والبادية وفى كل النواحى الهادية
فى الخرطوم زهورك نادية وتهواك النفوس ليك راضية
من ام در ياربوع سودانا نحييك وانت كل امالنا
بنعيم الجنوب جود لينا ومن فيض كردفان اغنينا
فى شرقك نصيد وادينا شمالك فيهو بركاوينا
تطرب بيك جميع اجيالك وفى كل البقع ترضالك
طوالى الفرح فى بالك ياربوع شوقنا فى استقبالك
من ام در ياربوع سودانا نحييك وانت كل امالنا
****   ****    ****    ****
حدق العيون
للشاعر محمد عبد القادر ابوشورة

حدق العيون ليك يا وطن
أصبح مقر وأصبح سكن
انت الملاذ ساعة المحن
وانت الشموخ عبر الزمن
****
غنّيت هواك قبل الفطام
وشبّيت على نهج الكرام
الليلة يا وهج الشموس
لابس شرف إسمك وسام
أباهي بيك بين الشعوب
رافع شعار مجدك سلام
ما إنت يا معنى الصمود
أصبحت للأحرار وطن
****
النيل كساك هيبة وجلال
يا ملهم الشعب النضال
انت العليك غنّى الخليل
وطرّز عتيق أرضك جمال
علّمنا كيف نبني ونعيش
كل اللي ضاع من غير مُحال
زي ما قبيل ورّيتنا كيف
ننسج قلاع كانت وطن
****
موعدنا يا وطني الحبيب
في عهدنا الزاهي الخصيب
نتلاقى والحب الكبير
وحّد هلالنا مع الصليب
أطفالنا في ظلّك طيور
يتراشقوا الحُب والحليب
ويتغنّوا في الساحات حبور
سوداننا يا أجمل وطن
****   ****    ****    ****
أحب مكان وطني السودان

أحب مكان وطني السودان .. لأن حسانو أعف حسان
طيورو صوادح وروضو جنان
فيه النيل النيل الخالد…… فيه الخال والعم والوالد
فيه من طارق ونالد…… والخيرات أشكال والوان
أحب مكان وطني السودان
السودان إشراقة جديدة…… في إفريقيا وبسمة سعيدة
فيه عروبة وجوها جديدة…… من آداب وفنون وبيان
أحب مكان وطني السودان
لينا الغد الزاهي المظهر…… لي إفريقيا ونورها الأخضر
للسودان وشبابو الأسمر…… للأحرار في كل مكان
أحب مكان وطني السودان .. لأن حسانو أعف حسان
طيورو صوادح وروضو جنان
https://youtu.be/-1BLNeZXF64