كل عام والسودان بخير

مليون سنة
للشاعر:
عبدالقادر محمد عبد القادر
تم التاليف بمروي1يناير2006
مليون سنة وعمرك مديد
علمك يهبهب كلما...
عمّت مياه النيل بلد
بقّت نجومك في السما
وطال النخل باسق سما
وكل ما الشمش مرقت صباح
والخير نما
ومسحت جباه الأرض ضو
زادت اواصر الإنتما
مليون سنة...
كل الجروف متلونه
كل الحروف مدوزنه
وكل الطيور فرحانه
تصدح بالغنا ....
ونيلك عظيم
قمرك يشق ليل الغلابة المُحْزَنه
مليون سنة ....
مويتك زُلال ... حبك حلال
مالِكْنَا مازَج للدما ...
مليون سنة ...
وآيات محاسنك تكتمل
تهزم وساوس الليل تهل
كل المآذن تبتهل ...
سودان وبس ... سودان موحد يا ولد
سودان من آدم وآدروب
سودان شمالو مع الجنوب
وارواح تسير مُتلاحمة
مليون سنة .... ومليون سنة
الشمعة فوق الشمعة زي
تاريخ مَوَرَث وكلو ضى
عبد اللطيف والأزهري
والمهدي قَبْلُو أيووي وسي
مليون سنة في كل بيت في كل حي
حرية تاريخ وانتصار
ورغم البيني بينك يا جني
الوحدة والفكر الوسيع
بتزيدو عمرك يا عظيم
وتصبح مخلد في السما
مليون سنة
ومليون سنة
🌴مروي ...عبدالقادر محمد عبد القادر
1/1/2006🌴